ՀՀ Բնապահպանության նախարար Արամ Հարությունյանը բնապահպանական հիմնահարցեր է քննարկել ԼՂՀ վարչապետ Արա Հարությունյանի հետ

21-12-2012

 

ՀՀ Բնապահպանության նախարար Արամ Հարությունյանի գլխավորած պատվիրակությունը դեկտեմբերի 19-ից երկօրյա աշխատանքային այցով գտնվում էր Լեռնային Ղարաբաղի Հանրապետությունում:

Այցի շրջանակներում Արամ Հարությունյանը հանդիպել է ԼՂՀ վարչապետ Արա Հարությունյանին:

Վարչապետը նշել է, որ Հայաստանի և Արցախի միջև նախկինում եղել է համագործակցություն, սակայն նախարարի այցից հետո երկու երկրների միջև համագործակցությունն ավելի կամրապնդվի: Վարչապետը հայտնել է, որ Արցախի Հանրապետությունն ունի զարգացման չորս կարևոր ուղղություն, որից երեքն առնչվում են բնապահպանության ոլորտի հետ:  ՙԱստիճանաբար զարգանում է հանքարդյունաբերությունը և այս առումով մենք մեծապես կարևորում ենք ձեր մասնակցության անհրաժեշտությունը: Արցախում հանքարդյունաբերությունը ավանդական ճյուղ չի եղել, ուստի մենք կարևորում ենք դրա զարգացումը և այդ ուղղությամբ աշխատանքներ ենք նախատեսում՚, - նշել է Արա Հարությունյանը: Վարչապետն ընդգծել է, որ բնապահպանության ոլորտում Արցախն ունի որակյալ մասնագետների պակաս:  Արա Հարությունյանը կարևորել է Հայաստանի աջակցությունը որակյալ կադրեր պատրաստելու հարցում: Ըստ վարչապետի Արցախում բնապահպանական խնդիրների շարքում են ջրերի և անտառների կառավարումը: ՙՀամապատասխան գույքագրում և հաշվարկներ չունենալու պատճառով տեղի է ունենում ռեսուրսների վատնում, իսկ դա կարող է հանգեցնել ջրային և անտառային ռեսուրսների նվազմանը՚,- նշել է վարչապետ Հարությունյանը:

ՀՀ բնապահպանության նախարարը շնորհակալություն հայտնելով ջերմ ընդունելության համար՝ հավելել  է, որ նախարարությունն ամեն ինչ կանի Արցախին աջակցելու գործում:  Խոսելով հանքարդյունաբերության խնդիրների մասին՝ նախարարն անդրադարձել է ֆլոտացիայի, կոնցենտրատների և պոչամբարների հարցերին: Նա նշել է, որ նորագույն տեխնոլոգիաների հնարավորին կիրառմամբ կարելի է լուծել այդ խնդիրները, իսկ Հայաստանի բնապահպանության նախարարությունը լայնորեն կաջակցի Արցախի կառավարությանն այդ հարցում: ՙՋրերի կառվարման հարցում մենք բավականին խորը ուսումնասիրություններ ունենք: Հայաստանում ստեղծվել է ջրերի կադաստր, ջրավազանային համակարգ, որը բաժանված է մի քանի մասերի՚,-նշել է նախարար Հարությունյանը: Նախարարը խոսել է բնության հատուկ պահպանվող տարածքների մասին, ներկայացրել Հայաստանի Հանրապետությունում դրանց համակարգային ու կառուցվածքային կառավարման մեխանիզմները, խոսել այդ ուղղությամբ տարվող հետագա աշխատանքների մասին: Արամ Հարությունյանն այդ համատեքստում անդրադարձել է Իրանի հետ նախատեսվող ՙԽաղաղության այգու՚ ստեղծմանը, և հույս հայտնել որ այս նախագծում կքննարկվի նաև Արցախի ներգրավման հարցը: Կադրերի պատրաստման հարցում Արամ Հարությունյանը խոստացել է բոլոր ձևաչափերով ու հնարավոր տարբերակներով օգնել ԼՂՀ-ին: ՙՄենք տրամադրված ենք, արցախյան կողմին ներգրավել տարբեր մասնագիտական դասընթացներում, կազմակերպել փորձի փոխանակմանն ուղղված հանդիպումներ՚,-ասել է Արամ Հարությունյանը: Հայկական և արցախյան պատվիրակությունների ղեկավարները քննարկել են նաև ձկնաբուծության զարգացման և ԼՂՀ ամենամեծ ջրային ավազանում՝ Սարսանգի ջրամբարում, մանրաձուկ բաց թողնելու վերաբերյալ հարցեր: Հայկական  կողմը ԼՂՀ կառավարությանը նվիրել է ավտոմեքենա, տեսչական համազգեստներ և համակարգիչներ:  Հանդիպման ավարտին կողմերը հուշանվերներ են փոխանակել:

<
>