Արամայիս Գրիգորյանն ընդունել է Վրաստանի Հանրապետության շրջակա միջավայրի պահպանության և բնական ռեսուրսների փոխնախարար Թեյմուրազ Մորգուլիային

31-03-2015

ՀՀ բնապահպանության նախարար Արամայիս Գրիգորյանն այսօր ընդունել է Վրաստանի Հանրապետության շրջակա միջավայրի պահպանության և բնական ռեսուրսների փոխնախարար Թեյմուրազ Մորգուլիայի ղեկավարած պատվիրակությանը:

Ողջունելով հյուրերին և բարձր գնահատելով հայ-վրացական բարեկամական հարաբերությունները` նախարարը հույս է հայտնել, որ այս այցը կդառնա առավել սերտ և ակտիվ համագործակցության սկիզբը:

Թեյմուրազ Մորգուլիան, իր հերթին շնորհակալություն հայտնելով ջերմ ընդունելության համար, վստահեցրել է, որ բնապահպանության ոլորտում Հայաստանի և Վրաստանի համագործակցությունն ամուր և կայուն հիմքերի վրա է, ինչը լավագույն նախապայման է առավել սերտ փոխգործակցության և համատեղ նոր ծրագրերի համար:

Փոխնախարար Թեյմուրազ Մորգուլիան` որպես Վրաստանի Օրհուս կենտրոնների տնօրեն, առաջարկել է ՀՀ բնապահպանության նախարարին նախաձեռնել երկու երկրների Օրհուս կենտրոնների համագործակցություն` էկոլոգիական կրթության և հասարակության իրազեկության բարձրացման, փորձի փոխանակման և այլ բնագավառներում: Նախարարը ողջունել է հյուրի նախաձեռնությունն ու խոստացել առաջիկայում համապատասխան ընթացք տալ առաջարկին:

Որպես ձկնկիթի արտահանման ոլորտում առաջին քայլերն անող երկիր` վրացական կողմը, հաշվի առնելով հայկական փորձը, մասնագիտական խորհրդատվական աջակցություն է խնդրել արտահանման համար անհրաժեշտ միջազգային CITES կոնվենցիայի համապատասխան դրույթների կիրառման վերաբերյալ:

Հայկական կողմն անդրադարձել է երկու հանրապետությունների կողմից վավերացված բնապահպանական կոնվենցիաների շրջանակներում ստանձնած պարտավորությունների կատարմանն ուղղված համատեղ ծրագրերի մշակման, իրականացման, ինչպես նաև բնապահպանության ոլորտում անդրսահմանային համագործակցության ամրապնդման հարցերին:

Կողմերը գոհունակությամբ նկատել են, որ Հայաստանն ու Վրաստանը միասին հանդիսանում են 12 բնապահպանական կոնվենցիաների կողմ երկրներ:

Հանդիպման ավարտին կողմերը փոխանակել են երկու երկրները խորհրդանշող հուշանվերներ, ինչից հետո նախարար Գրիգորյանի հանձնարարությամբ ստեղծված խորհրդատվական աշխատանքային խումբը շարունակել է աշխատանքները վրացական կողմի հետ CITES կոնվենցիայի պահանջների կիրառման հարցերի շուրջ:

 

<
>