ՀՀ բնապահպանության նախարարն այսօր ընդունել է կովկասի բնության հիմնադրամի տնօրենին

07-07-2016

ՀՀ բնապահպանության նախարար Արամայիս Գրիգորյանն ընդունել է Կովկասի բնության հիմնադրամի/CNF/ տնօրեն Ջեով Ջիակոմինիին և ազգային համակարգող Արման Վերմիշյանին:

Հանդիպման ընթացքում կողմերը քննարկել են ՀՀ բնության հատուկ պահպանվող տարածքների /ԲՀՊՏ/ ենթակառուցվածքների կատարելագործման, նյութատեխնիկական կարիքների համալրման, ԲՀՊՏ-ների կառավարման պլանների, էկոտուրիզմի զարգացման և այլ հարցեր:

Անդրադառնալով <<Դիլիջան ազգային պարկ>> ՊՈԱԿ-ի 2016-26թթ. կառավարման պլանին՝ CNF Հայաստանի ազգային համակարգող Արման Վերմիշյանը նշել է, որ հաշվի են առնվել շահագրգիռ կառույցների կողմից ներկայացված կարծիքներն ու առաջարկները, այս պահին անցնում է շրջակա միջավայրի վրա ազդեցության գնահատման փորձաքննություն և լիարժեք կերպով պատրաստ կլինի կիրառման:

Քննարկելով ԲՀՊՏ-ների նյութատեխնիկական կարիքները և ԲՀՊՏ-ներում ապօրինի անտառհատման և էկոհամակարգի վրա բացասական ազդեցության նվազեցման հարցերը՝ Արամայիս Գրիգորյանը մասնավորապես ընդգծել է, որ ԲՀՊՏ-ների հարակից համայնքների ազգաբնակչությունն ունի վառելիքի խնդիր, ինչը դրդում է նրանց ապօրինի ծառահատման. <<Սա հնարավոր է կարգավորել Դիլիջանում՝ անտառի թափուկի, իսկ Սևանում՝ ջրածածկ տարածքներից հանված անտառտնկարկների վերամշակման միջոցով: Անհրաժեշտ սարքավորումների ներդրմամբ հնարավոր կլինի տեղում ստանալ այլընտրանքային վառելիք և նվազեցնել ապօրինի անտառհատման դեպքերը ԲՀՊՏ-ներում: Բնապահպանական այս կարևոր միջոցառումը կնպաստի ինչպես էկոհամակարգի պահպանությանը, այնպես էլ որոշ չափով կթեթևացնի համայնքների բնակիչների սոցիալական խնդիրը:>>

Կողմերը քննարկել են նաև ԲՀՊՏ-ներում էկոզբոսաշրջության զարգացման խթանման հեռանկարները: Այս համատեքստում նախարար Գրիգորյանը շեշտել է համապատասխան ենթակառուցվածքների կատարելագործման և հզորացման հարցը՝ մասնավորապես ընդգծելով ԲՀՊՏ-ների փոխկապակցված և համալիր գործողությունների մշակման, էկոերթուղիներում ենթակառուցվածքների բարելավման և զբոսաշրջային ծառայությունների ներդրման անհրաժեշտությունը:

<
>