ՀՀ բնապահպանության նախարարությունը խախտումների դիմաց մեկ շաբաթվա ընթացքում հաշվարկել է 7.5մլն. դրամի շրջակա միջավայրին հասցված վնաս

14-04-2017

ՀՀ բնապահպանության նախարարությունը խախտումների դիմաց մեկ շաբաթվա ընթացքում հաշվարկել է 7.5մլն. դրամի շրջակա միջավայրին հասցված վնաս

ՀՀ բնապահպանական պետական տեսչության կողմից 10.04-14.04.2017թթ. ժամանակահատվածում իրականացված շրջայցերի, ԲՊՏ վարույթին հանձնված գործերի քննության և հաշվետվությունների ընդունման գործընթացում հայտնաբերված խախտումների արդյունքում կայացվել է 330.0հազ.դրամ ընդհանուր գումարի վարչական տուգանքի 6 որոշում և հաշվարկվել 7.5մլն.դրամ ընդհանուր գումարի շրջակա միջավայրին հասցված վնաս:

Մասնավորապես`

Բուսական աշխարհի պահպանության ոլորտ

Կազմվել է վարչական տուգանքի 5 որոշում՝ 250.0հազ.դրամ ընդհանուր գումարի և հաշվարկվել է 7.5մլն.դրամ ընդհանուր գումարի շրջակա միջավայրին պատճառված վնաս, որից՝

Երևան քաղաքի Դավթաշեն վարչական տարածքում հատված 29 ծառերի համար հաշվարկվել է շրջակա միջավայրին հասցված 2.86 մլն. դրամ գումարի վնաս և գործին համապատասխան ընթացք տալու համար այն ուղարկվել է ՀՀ ոստիկանության Երևան քաղաքի վարչության Մաշտոցի բաժին:

Տավուշի տարածքային բաժնի վարույթին հանձնված գործերի քննության արդյունքում 5 ֆիզիկական անձանց նկատմամբ ապօրինի հատված 14 ծառի համար կայացվել է 250.0հազ.դրամ ընդհանուր գումարի վարչական տուգանքի 5 որոշում և հաշվարկվել է 1.81 մլն.դրամ ընդհանուր գումարի շրջակա միջավայրին հասցված վնաս:

ՀՀ ԲՆ-ի «Թեժ գծի» ահազանգերի հիմքերով Տավուշի ՏԲ-ի կողմից կատարվել են հետևյալ աշխատանքները՝

- «Դիլիջան ԱՊ» ՊՈԱԿ-ի տարածքում հատված ապօրինի ծառահատումների հիմքով իրականացվել են ուսումնասիրություններ, ինչի արդյունքում հայտնաբերվել են ապօրինի հատված 14 ծառ, հաշվարկվել է պետությանը պատճառված 1.9 մլն. դրամ գումարով վնաս:

- Իջևանի անտառտնտեսության «Աշոտ Երկաթ» բերդ հատվածում կատարվել է ուսումնասիրություն և հատված 21 ծառի համար հաշվարկվել է շրջակա միջավայրին պատճառված 0.93 մլն.դրամ գումարի վնաս:

Կազմված ակտերի վերաբերյալ իրազեկվել է ոստիկանությանը:

Հողերի պահպանության ոլորտ

ՀՀ ԲՆ-ի «Թեժ գծի» ահազանգի հիմքով Տավուշի ՏԲ-ի կողմից կասեցվել են «Գոշ» լճի շրջագայքում իրականացված հողային աշխատանքների ընթացքը, կիրականացվեն ստուգումներ:

Ապօրինի որսի իրականացման համար

Շաբաթվա ընթացքում հայտնաբերվել և առգրավվել է 274 հատ (162.0 կգ) «սիգ» տեսակի ձուկ, որից՝

Երևանի տարածքային բաժնի կողմից Սևանա լճից «սիգ» ձկնատեսակի ապօրինի որսի և դրա վաճառքի կանխարգելմանն ուղղված միջոցառումների արդյունքում շաբաթվա ընթացքում Երևան քաղաքի շուկաներից առգրավվել է 87 հատ /36.0 կգ/ «սիգ» տեսակի տիրազուրկ թարմ ձուկ, որն oրենքով սահմանված կարգով նվիրաբերվել է ՀՀ աշխատանքի և սոցիալական հարցերի նախարարության «Զատիկ» երեխաների աջակցության կենտրոն ՊՈԱԿ և ՀՀ կրթության և գիտության նախարարության Երևանի լսողության խանգարումներ ունեցող երեխաների հատուկ կրթահամալիր:

Արարատի տարածքային բաժնի կողմից իրականացված շրջայցերի արդյունքում հայտնաբերվել է ձկան ապօրինի վաճառքի մեկ դեպք, առգրավվել է 45 հատ /18.0 կգ/ «սիգ» տեսակի ձուկ, որը հանձնվել է «Առաքելություն Հայաստան» հասարակական կազմակերպությանը:

ԲՊՏ կենտրոնական ապարատի աշխատակիցների կողմից շրջայցերի արդյունքում առգրավվել է 142 հատ /108.0 կգ/ «սիգ» տեսակի ձուկ:

Արագածոտնի տարածքային բաժինը ուսումնասիրել է Ապարան և Թալին քաղաքներում անազատության մեջ պահվող 2 արջի պահման իրավական հիմքերը, աշխատանքներն ընթացքի մեջ են:

Թափոնների ոչ ճիշտ տեղադրման համար

Ի արձագանքումն նախարարության «թեժ» գծով ստացված ահազանգի, Կոտայքի ՏԲ-ն ուսումնասիրել է «Քանաքեռ ՀԷԿ»-ի տարածքում անօրինական տեղադրված շինարարական թափոնների պատկանելիության հարցը և Զովունի համայնքի ղեկավարին տրվել է հետագայում նմանատիպ դեպքերի բացառման մասին հանձնարարական:

Բնապահպանական և բնօգտագործման վճարների եռամսյակային հաշվետվությունները սահմանված ժամկետում չներկայացնելու համար

Շիրակի տարածքային բաժնի կողմից 1 տնտեսվարողի նկատմամբ կայացվել է 80.0հազ.դրամ գումարի վարչական տուգանքի որոշում:

Վարչարարության և փորձաքննության բաժինը հաշվետու ժամանակաշրջանում դատական ակտերի հարկադիր կատարման է ներկայացրել 3 վարչական տուգանքի որոշում` 250.0 հզ.դրամ ընդհանուր գումարի չափով: ՀՀ վարչական դատարան է ներկայացվել 8 հայցադիմում` 788.0 հազ.դրամ պատճառված վնասի և վարչական տուգանքի գումարները դատական կարգով գանձելու համար:

Ընդհանուր առմամբ ՀՀ բնապահպանության նախարարության բնապահպանական պետական տեսչության կիրառած պատժամիջոցներից հաշվետու ժամանակահատվածում ՀՀ պետական բյուջե է մուտքագրվել 1.0 մլն.դրամ գումար:

<
>