«Մաքուր Հայաստան» ծրագրի շրջանակներում մաքրման աշխատանքներ են արվել ՀՀ բնապահպանության նախարարության աշխատակազմի տարածքային բոլոր ստորաբաժանումների կողմից

29-05-2017

ՀՀ բնապահպանության նախարարության ներքո գործող բնության հատուկ պահպանվող բոլոր տարածքներում /ԲՀՊՏ-ներ/ և դրանց հարակից համայնքների մերձակայքում, որոնք ընդգրկում են Հայաստանի բոլոր մարզերը, իրականացվել են մաքրման և բարեկարգման աշխատանքներ: Համապետական շաբաթօրյակին մասնակցել են ոչ միայն ԲՀՊՏ-ների այլև նախարարության աշխատակազմի տարածքային ստորաբաժանումների աշխատակիցները:

«Սևան» ազգային պարկի աշխատակիցներն աղբից մաքրել են հանրային երեք լողափ, պարկի արգելոցները, արգելավայրերը, ռեկրեացիոն և տնտեսական գոտիները:

ՀՀ Սյունիքի մարզի «Զանգեզուր» կենսոլորտային համալիր» ՊՈԱԿ-ում մաքրվել են «Սոսու պուրակ» արգելավայրը, «Շիկահող» արգելոցի ջրվեժի և Նախնադարյան կամրջի, այցելուների կենտրոնի հարակից տարածքները, «Արևիք» ազգային պարկի Բողաքար արգելավայրի, Նյուրքի աղբյուրի և Շվանիձոր համայնքին հարակից տարածքներ, «Զանգեզուր» արգելավայրի Նոր Աստղաբերդի տեղամասը:

«Արփի լիճ» ազգային պարկ»-ի աշխատակիցները մաքրել են վարչական շենքի տարածքը, Զորակերտ, Բերդաշեն, Ծաղկուտ գյուղերի և Արփի լճով անցնող սահմանաեզրի միջև գտնվող տարածքները:

«Խոսրովի անտառ» պետական արգելոցում մաքրվել են «Խոսրով», «Խաչաձոր», «Գառնի», «Կաքավաբերդ» տեղամասերը, «Խոր-վիրապ» պետական արգելավայրը, «Գոռավանի ավազուտներ» պետական արգելավայրը:

ՀՀ Տավուշի մարզի Կողբ գյուղից մինչև «Զիկատար» պետական արգելավայրի տարածք տանող ճանապարհը, «Զիկատար» ուսումնական կենտրոնի հարակից և մոտակայքում գտնվող լճակի տարածքները մաքրել են ուսումնական կենտրոնի աշխատակիցները:

«Դիլիջան» ազգային պարկի անձնակազմը մաքրել է Հաղարծին վանական համալիր տանող ճանապարհին կից գտնվող տաղավարները, Ջուխտակ վանքեր տանող ճանապարհին կից գտնվող տաղավարների հարակից տարածքները, Դիլիջան-Ջուխտակ վանքեր մատուռ-Շամախյան էկոերթուղին:

Մաքրման աշխատանքներ են տարվել նաև «Արգելոցապարկային համալիր» ՊՈԱԿ-ի ենթակայության տակ գտնվող «Ջրվեժ» անտառպարկում, «Էրեբունի» պետական արգելոցում, Ստեփանավանի «Սոճուտ», «Իջևանի» և Բերդի «Սորաններ» դենդրոպարկերում:

Համապետական շաբաթօրյակին միացել են նաև Բնապահպանական պետական տեսչության տարածքային ստորաբաժանումների աշխատակիցները:

 

<
>