Շրջակա միջավայրի նախարարի տեղակալ Իրինա Ղափլանյանն այսօր ընդունել է Հայաստանում ԱՄՆ փոխդեսպան Քրիսթոֆեր Սմիթին

14-01-2020

Առաջին աշխատանքային հանդիպման ընթացքում կողմերն անդրադարձել են երկկողմ փոխգործակցությանը վերաբերող մի շարք հարցերի։
Նախարարի տեղակալ Իրինա Ղափլանյանը Սմիթին ներկայացրել է Հայաստանի բնապահպանական քաղաքականության 2020 թվականի հիմնական ուղղությունները՝ մասնավորապես անդրադառնալով անտառվերականգնման և անտառպահպանության գործընթացներին, պոլիէթիլենային տոպրակների դեմ պայքարին միտված լայնածավալ աշխատանքներին և մի շարք այլ օրակարգային հարցերին։
Իրինա Ղափլանյանը բարձր է գնահատել նախարարության և ԱՄՆ դեսպանատան կողմից համատեղ իրականացվող ծրագրերի ընթացքը՝ կարևորելով փորձի փոխանակման անհրաժեշտությունը։
Փոխդեսպան Սմիթն իր խոսքում մասնավորապես նշել է․
«Մենք կարևորում ենք բնության պահպանության և շրջակա միջավայրի պաշտպանության ոլորտում Հայաստանի հետ գործակցության հնարավորությունները։ Ջրային ռեսուրսների, անտառների, վայրի կենդանիների ու բույսերի անօրինական առևտրի ուղղությամբ մեր համատեղ աշխատանքը Հայաստանի շրջակա միջավայրի ու հարուստ կենսաբազմազանության պահպանությանն ուղղված ջանքերից սոսկ մի քանիսն են, որոնք նաև խթանում են տնտեսական աճն ու նպաստում բարեկեցությանը»։
Նախարարի տեղակալ Իրինա Ղափլանյանն ու փոխդեսպան Քրիստոֆեր Սմիթը պատրաստակամություն են հայտնել շարունակել սերտ գործակցությունն ու նոր մակարդակի բարձրացնել ոլորտային համագործակցությունը։

<
>